NGA ANILA JOLE*
GREQI- Bashkëshortja e ish-ministrit grek të Mbrojtjes Akis Tsohaxopulos, Viki Stamati është arratisur natën e kaluar nga spitali psikiatrik Dromokatio. Stamati po kurohej në spital e ruajtur nga gardianë burgu, të cilët në orën 05:45 e kuptuan se dhoma e saj ishte bosh dhe njoftuan policinë, e cila po zhvillon kërkime për gjetjen e saj.
Avokati Fragiskos Ragusis, tha për televizionin Mega Channel se ai kishte folur dje me Stamatin, pasi gjykata kishte refuzuar kërkesën e saj për lirimin nga burgu. Sipas avokatit, ajo i kishte thënë: “Nuk kam për të vdekur e çmendur dhe e braktisur në Dromokaitio. E vetmja që dua është të jem pranë fëmijës tim”.
Për çështjen po zhvillon hetime edhe Ministria e Drejtësisë. Ish-ministri i Mbrojtjes Akis Tsohaxopulos u arrestua në vitin 2012 dhe u dënua për afera korruptive në të cilat u akuzua se ishte e përfshirë edhe e shoqja Viki Stamati. Akis Tsohaxopulos ka qenë figurë e rëndësishme në PASOK dhe ministër i qeverive të majta që nga viti 1981 deri në 2004.
(m.k/BalkanWeb)