Davide Pecorelli, 47 vjeç, biznesmeni nga San Giustino, i cili inskenoi vdekjen e tij në Shqipëri në janar të vitit të kaluar në tentativë për t’i shpëtuar borxheve në vendin e tij, do të lirohet nga burgu. Një vendim i tillë është marrë vetëm 2 ditë pas arrestimit të tij me qëllim ekstradimin në Shqipëri.

Mediat italiane raportojnë se Pecorrelli do të lirohet nga burgu pas përfundimit të procedurave, vendimi ky i marrë nga Gjykata e Apelit me kërkesë të Prokurorit të Përgjithshëm, i cili kishte kërkuar shpalljen e arrestimit si të pavlefshëm.

Pecorelli akuzohet nga autoritetet shqiptare për mashtrim, deklarime të rreme, pengim të drejtësisë, dëmtim të pronës, zjarrvënie dhe kalim të paligjshëm të kufirit.

Ditën e shtunë, pas arrestimit të tij,  reagoi edhe policia shqiptare e cila tha se pritet ekstradimi i tij.

Njoftimi i policisë:

Policia e Shtetit

Vijon shkëmbimi i informacionit me partnerët, për kapjen e shtetasve të kërkuar ndërkombëtarisht.

Finalizohet nga Policia italiane, në bashkëpunim me Policinë shqiptare, operacioni policor i koduar “Perugia”.

Kapet dhe vihet në pranga një shtetas italian, i shpallur në kërkim ndërkombëtar, me masë sigurie nga Gjykata e Pukës, për një sërë veprash penale.

Në vijim të bashkëpunimit policor me partnerët italianë, me qëllim lokalizimin dhe kapjen e shtetasve të shpallur në kërkim ndërkombëtar, mbrëmjen e sotme, në Perugia, Itali, Policia italiane, në bazë të kërkesave të autoriteteve policore dhe të drejtësisë shqiptare, falë shkëmbimit të informacionit mes policive të të dy vendeve, finalizoi operacionin policor të koduar “Perugia”, në kuadër të të cilit kapi dhe vuri në pranga shtetasin italian D. P., 47 vjeç.

47-vjeçari ishte i shpallur në kërkim ndërkombëtar, pasi Gjykata e Rrethit Gjyqësor Pukë, ka caktuar ndaj tij, masën e sigurisë “Arrest në burg”, për veprat penale: “Mashtrimi”, “Dhunimi i varreve”, “Veprime që pengojnë zbulimin e së vërtetës”, “Shkatërrimi i pronës me zjarr” dhe “Kalimi i paligjshëm i kufirit shtetëror”.

Ky shtetas, në janar të vitit 2021, inskenoi ngjarjen e vrasjes së tij dhe djegies së trupit.

Si rezultat i hetimeve të thelluara të kryera nga strukturat hetimore të Policisë së Shtetit shqiptar dhe Prokuroria e Pukës, në bashkëpunim me homologët italianë, u bë e mundur zbardhja e ngjarjes, si dhe lokalizimi i shtetasit D. P., në një ishull.

Arrestimi i 47-vjeçarit, nga Policia italiane mbrëmjen e sotme në Perugia, u bë me qëllim ekstradimi drejt vendit tonë.

(BalkanWeb)