Është një finale për Tiranën, por është një sfidë shumë e rëndësishme edhe për Vllazninë, pasi shkodranët synojnë të ruajnë vendin e dytë. Brdaric është i vetëdijshëm për rëndësinë e këtij takimi, çfarë përfaqëson kjo përballje, për këtë arsye nuk fshihet, por është i qartë teksa thekson se në Tiranë shkojnë për fitore:

“Është një ndeshje speciale dhe e madhe, ne shkojmë për të marrë tri pikë. Dy ndeshjet e fundit na dhanë shtysë dhe do përgatitemi për një ndeshje të fortë. Tirana e ka si finale? Po, ata luajnë kundër Vllaznisë. Një kundërshtar i fortë për ta. Mezi e pres këtë betejë të fortë.

Në konferencë për shtyp, në vigjilje të klasikes kundër Tiranës, tekniku gjerman shtoi se Vllaznia zbret e motivuar në maksimumin pasi synojnë një vend të mirë në tabelën e renditjes, për të siguruar më pas një avantazh të lehtë në “final-four”:

“Jam realist, vendi i parë i dytë dhe i tretë do sigurohen në këto sfida. Ne jemi të qetë dhe të motivuar. Kemi marrë shenja të mira, jemi të gjithë për një drejtim bashkë me klubin”