Nuk janë mbushur ende dy javë nga dita kur priti kampion e çadrave për të pastrehët dhe të tmerruarit e tërmetit të 26 nëntorit, ndërsa pasditen e së dielës u kthye në skenën e nderimit të viktimave, solidarizimit të atyre qëuajtën dhe pse jo, për të dhënë një mesazh se jeta vazhdon. Stadiumi “Niko Dovana” i Durrësit, një nga qytetet më të prekura nga fatkeqësia natyrore, priti sfidën e parë të futbollit mes vendasve të Teutës dhe Skënderebeut.
Të zotët e shtëpisë fituan 1-0 falë një goli të vonë por shumë të bukur të Vilës. Por deri te suksesi skuadrat rrezikuan shumë pak në pjesën e parë. Përpjekjet në të dyja portat ishin të vakta, teksa ekipet u kthyen me rrjeta të paprekura në dhomat e zhveshjes. Pas pushimit, ritmi ndryshoi, teksa Teuta kërkoi më shumë golin e epërisë. I pakalueshëm Koliçi, teksa edhe Skënderbeu nuk arriti të shfrytëzojë rastet për shënim.
Kur sfida po shkonte drejt barazimit të sigurtë, në limitet e kohës së rregullt, Vila me akrobacinë e tij ndryshoi fatin e ndeshjes, duke I dhuruar Teutës fitoren dhe tri pikë të rëndësishme që e ngjisin në vendin e pestë. Nga ana tjetër, Skënderbeu frenon pas dy fitoreve radhazi dhe humb ndjeshëm terren në renditje pas javës së 14-të të Superligës.
(balkanweb)