Gjithsej 44 deputetë të VMRO-DPMNE-së dhe koalicionit, si garanci për popullin, janë betuar te noteri me deklarata të nënshkruara se nuk do të pranojnë ndryshimin e Kushtetutës.

Kjo u komunikua sot nga lideri i kësaj partie, Hristijan Mickoski, duke nënvizuar se nuk ka asnjë devijim as një milimetër nga kjo.

“Nuk ka asnjë hap prapa sepse gjithçka që kemi është pas nesh, dinjiteti, nderi dhe Maqedonia jonë. Me një ndjenjë të veçantë krenarie, dua të falënderoj njerëzit që dolën në rrugë masivisht dhe në numër të madh dhe ishin një kështjellë sfide për ditë të tëra. Përkundër të gjitha sulmeve dhe presioneve, populli doli dhe nuk u tërhoq”, tha Mickoski, duke shtuar se protestat ishin të popullit dhe jo të VMRO-DPMNE-së.

Lidhur me zhvillimet e sotme në Kuvend, Mickoski i cilësoi si turp për shtetin.

“Ky është përfundimi i pjesës së dytë të tradhtisë së Zaevit. Tradhtia do të jetë ndërgjegjja shqetësuese me të cilën duhet të jetojë çdo deputet dhe anëtar i Qeverisë që e ka mbështetur këtë propozim. Gjithçka do të kalojë dhe pas pak vitesh do t’u duhet sërish t’i shikojnë njerëzit në sy në rrugë. Fokusi i tyre është një luftë e zhveshur për një kolltuk. Nuk harruan vjedhjen, tenderat, anekset, por populli dhe Koalicioni VMRO-DPMNE është këtu për t’ua kujtuar tradhtinë dhe sulmin ndaj shtetit”, theksoi ai.

Mickoski tha se zgjedhje duhet të ketë, dhe VMRO-DPMNE garanton se bullgarët nuk do të futen në Kushtetutë dhe garanci për këtë janë deputetët e opozitës që janë bashkë në këtë betejë.

Qeveria e ardhshme e udhëhequr nga VMRO-DPMNE, sipas Mickoskit, do të ketë një detyrë të vështirë për të korrigjuar atë që ka gabuar qeveria aktuale dhe, siç thotë ai, “ta kthejë atë që është vjedhur dhe t’i bëjë ata të përgjigjen për atë që kanë bërë”./ INA