Deputeti i Partisë Socialiste, Blendi Klosi, tha se partia ku ai aderon nuk ka dy standarde, e këtu iu referua sanksioneve të vendosura nga SHBA ndaj babait të deputetit Orlando Rakipi, Aqif Rakipi.
Ai tha se aktualisht në grupin parlamentar të PS nuk ka persona të akuzuar apo implikuar dhe kësisoj sipas Klosit, nuk është marrë vendim për vijimësinë e Rakipit si deputet.
“Në asnjë rast nuk përdorim dy standarde, nuk komentojmë qëndrimet e aleatit tonë më të madh, si SHBA. Në rastin konkret nuk kemi asnjë anëtar të grupit të akuzuar apo shpallur non grata.
Qëndrimi është i qartë. Nuk kemi asnjë deputet të akuzuar. Ne si grup parlamentar të PS nuk gjykojmë qëndrimin e SHBA, por gjithmonë jemi dakordësuar që ai qëndrim është dhe për ne. Besoj që në Kongres u dëshmua që jemi parti e përgjegjshme. Jemi e përgjegjshme për të kuptuar se çfarë duan qytetarët. Kongresi ishte një diskutim me grupet e caktuara të interesit dhe jemi një parti, që përgatitemi shumë për garën e ardhshme elektorale. Sot një vit, Shqipëria do të jetë në fushatë elektorale për bashkitë e vendit. PS e ka obligatore garën për të fituar bashkitë. Ne synojmë të gjitha bashkitë.
Ne përgatitemi, gjykojmë, analizojmë. Gjykojmë edhe për punën që bëjnë kryetarët tanë. Përgatitemi që sot për të shkuar në garën e ardhshme”, tha Rakipi.
(BalkanWeb)
