Drejtori i Zjarrfikëses së Tiranës Shkëlqim Goxhaj në një komunikim për mediat foli për zjarrin që përfshiu pallatin tek rruga e Kavajës në Tiranë.

Ai bëri me dije se në këto momente zjarri është nën kontroll dhe se nuk ka persona të lënduar. Ndërsa shtoi se dëmet materiale janë të mëdha.

“Situata e zjarrit është nën kontroll zjarri po shkon drejt izolimit. Po vijojmë me vatrën e fundit të zjarrit që është në një banesë. Zjarri ka marrë përmasa të shpejta. Që në momentet e para jemi interesuar për qytetarët e gjendur në banesë dhe kemi kryer evakuimin e qytetarëve. Nga kontrollet e kryera nuk na rezulton që të kemi qytetarë të dëmtuar në banesa. Dëmet nga zjarri janë shumë të mëdha, por po shkon drejt izolimit. Ky ka qenë një rast i veçantë për qytetin e Tiranës. Kjo e ka vështirësuar edhe ndërhyrjen e shërbimit zjarrfikës dhe është dashur një kohë e gjatë për të vënë zjarrin në kontroll. Fasada e objektit ka përhapur vatrën e zjarrit. Situata e zjarrit është nën kontroll”, deklaroi Goxhaj.

Gjithashtu bëri me dije se zjarri ka bërë dëm shumë të madh dhe fatmirësisht nuk ka persona të lënduar.

“Në këto momente nuk mund të flasim për shkakun e zjarrit, pasi për këtë do të flasin ekspertët”, ka thënë ai.

(BalkanWeb)