Dy javë pas zjarreve vdekjeprurëse që shkatërruan ishullin Maui, Hawaii, autoritetet e këtij shteti amerikan njoftuan dje se vazhdojnë të numërojnë 1100 persona të zhdukur, bazuar në listën e hartuar nga FBI, e cila kërkon ndihmën e të afërmve në hetimet e saj.
Zjarret, më vdekjeprurëset në një shekull në SHBA, kanë vrarë të paktën 115 njerëz, sipas numërimit të fundit zyrtar, i cili është paraprak.
Tragjedia mund të rezultojë të jetë e përmasave edhe më të mëdha, me një bilanc shumë më të rëndë. Zjarri pothuajse fshiu nga harta qytetin turistik të Lahaina (12 mijë banorë), emrat e mijëra personave të zhdukur shfaqen në faqet e rrjeteve sociale ose në dosjet e agjencive të ndryshme.
Zjarret në Hawaii tani janë të dytat më vdekjeprurëse në historinë moderne të SHBA
FBI, policia federale, tani po përpiqet të konsolidojë të dhënat. Qëllimi është “të jemi në gjendje të përcaktojmë se sa dhe kush janë ende të zhdukur,” tha agjenti special Stephen Merrill për shtypin. Pas studimit të listave, policia federale numëron “1,100” të zhdukur, shtoi ai.
Numri ka të ngjarë të “rritet”, shtoi ai, pasi FBI “ende mbledh të dhëna shtesë”. Të hënën mbrëma, një zyrtar në ishullin Maui foli për 850 persona të zhdukur.
FBI ka krijuar një linjë telefonike dhe ka inkurajuar të afërmit e personave të zhdukur që ta kontaktojnë atë.
“Ne kemi vërtet nevojë për ndihmën e publikut,” shpjegoi zoti Merrill, duke shpjeguar se disa nga të zhdukurit janë të listuar vetëm me emrat e tyre në listat online. vNë këto raste, më shumë informacion, si mbiemrat dhe datat e lindjes, mund të ndihmojnë policinë të identifikojë disa ose të konfirmojë se të tjerët janë zhdukur.
Autoritetet po bëjnë çmos për të verifikuar informacionin dhe shpresojnë të nxjerrin një “listë të verifikuar” të të zhdukurve “në ditët në vijim”, tha shefi i policisë së Maui, John Pelletier.
FBI ka dërguar gjithashtu agjentë për të mbledhur mostra të ADN-së nga anëtarët e familjeve të personave të zhdukur, që nuk mund të shkojnë në Maui, kudo që janë. Pasi identifikimi i kufomave të gjetura është nga më të vështirët dhe i pamundur pa këtë material gjenetik.
Nga 115 viktimat, vetëm 27 janë identifikuar në këtë fazë.
Vetëm 104 mostra janë mbledhur dhe autoritetet po përpiqen të largojnë çdo hezitim. “Profilet e ADN-së nuk do të mbeten në dosjet e FBI-së” ose të policisë lokale, garantoi Prokurori i Qarkut Maui, Andrew Martin. “Arsyeja e vetme që do të përdoren do të jetë identifikimi i personave të zhdukur”, shtoi ai.
