Një incident tragjik ka ndodhur në qytetin turistik Ubrique, në provincën Cadiz të Spanjës, ku një burrë 57-vjeçar humbi jetën gjatë festivalit “Toro del Gayumbo”. Gjatë përpjekjes për të shpëtuar, ai u përpoq të ngjitej dhe të mbahej pas hekurave të një dritareje, por humbi ekuilibrin, ra dhe u sulmua disa herë nga demi me emrin Mosquetero.

Përkundër transportimit të menjëhershëm drejt qendrës më të afërt shëndetësore, ai ndërroi jetë pak pas mbërritjes, raportojnë mediat ndërkombëtare. Në shenjë zie dhe respekti për jetën e humbur, autoritetet vendore shpallën një ditë zie dhe anuluan shfaqjen e fishekzjarrëve të planifikuar për në mbrëmje. Ngjarja ka tronditur komunitetin lokal, ndërkohë që disa banorë kanë kritikuar vazhdimin e organizimit të këtyre eventeve, të cilat, sipas tyre, përbëjnë rrezik si për njerëzit, ashtu edhe për kafshët.

Ngjarje të këtij lloji janë regjistruar edhe në rajone të tjera të Spanjës gjatë viteve të fundit, duke rikthyer debatet mbi masat e sigurisë në festivalet tradicionale me demat.

Autoritetet u kanë bërë thirrje qytetarëve që të tregohen të qetë dhe të respektojnë dhimbjen e familjes së viktimës.