Trajneri i Laçit, Besnik Prenga, foli pas ndeshjes për mikrofonin e “Supersport”. Tekniku kurbinas u shpreh tepër i zhgënjyer nga paraqitja e skuadrës duke ngritur “kambanat” e alarmit për momentin jo të mirë që bardhezinjtë po kalojnë.

Çfarë nuk funksionoi?
Nuk e kisha përgatitur ndeshje për ta pritur Tiranën. Ne kemi kohë që nuk luajmë hiç. Nuk kemi pësuar humbje të tilla. Kemi luftuar për topin e parë. Ndërsa sot nuk bëmë asgjë. Ishte fitore e merituar e Tiranës.. Do jetë shumë e vështirë ta fitojmë Kupën. Luajtëm përballë një ekipi shumë më të mirë se ne. Ka kohë që ne nuk po luajmë hiç. Edhe ndeshjen me Partizanin nuk e di as unë si e morëm. Ndeshja sot u dominua nga Tirana, nga të gjitha anët.

Cili është objektivi i Laçit?
Unë nuk dorëzohem. Ne besojmë ose mendojmë që të ndodhë diçka tjetër. Po nuk ndryshuam, ne ngjajmë me ekip veteranësh, jo me ekip serioz. Është koha për të ndryshuar diçka. Nuk bëjmë asnjë gjë. Presim minutat të kalojnë. Nuk mund të dilnim më mirë.

Nuk je i kënaqur as me lojtarët as me lojën…
Kemi pasur fatin që kanë gabuar edhe të tjerët. Kemi bërë 2-3 ndeshje të mira, të tjerat janë pasiguri, ndeshje luftë dhe jo ndeshje futbolli. Mbas ndeshjes nuk e dimë çfarë kemi bërë. Përgjegjësia është e imja. Në janar mund të bënim zgjedhje më të mira. Ne jo vetëm që nuk e forcuam ekipin, po nuk e kemi rivalizuar. Sot ndodhi ajo që meritonim me kohë.

Cili mendoni se është problemi?
Çunat janë të mrekullueshme dhe të dëgjojnë. Por tjetër gjë janë miqësoret, tjetër gjë janë ndeshjet e kampionatit. Ne nuk e kemi gjetur kush bën diferencën. Momentalisht s’jemi ekip që mund të luajmë në sulm. Gjendja jonë është kjo. Prandaj është shumë e rëndësishme që të gjithë të fillojnë të kuptojnë, që duhet të nxjerrim jo vetëm djerës, por edhe gjak, për ta mbaruar ndeshjen me sukses.

A është kjo skuadër e aftë të shkojë në Kupat e Europës këtë sezon?
Unë jo më kot iu kam rënë kambanave. Duhet të bëjmë të pamundurën për të bërë diçka. Kemi që nga janari që po përpiqemi të ndryshojmë diçka. Nuk ia kam arritur qëllimit. 2 ndeshjet që kemi fituar nuk kanë qenë ndeshjet që na kanë kënaqur me nivel. Unë nuk flas fjalë boshe. Kjo nuk është rrugë e mirë. Laçi ka emër. Vitet e fundit ka traditë në Europë dhe kampionatin shqiptar. Erdha me qëllimin për të ndryshuar diçka. I pari që kam dështuar jam unë. Kryesorja është që ne të mbledhim mendjen dhe zemrën dhe të vendosemi në shërbim të klubit për të dalë nga kjo situatë.

(j.s/BalkanWeb)