SPAK lëshoi dje urdhër-arreste për ish-kreun e Bashkisë së Durrësit Vangjush Dako. Ky i fundit akuzohet për shpërdorim detyre, në lidhje me një pallat të ndërtuar në qendër të qytetit të Durrësit, godinë e cila pësoi dëme të mëdha nga tërmeti i 2019-ës.
Vangjush Dakos u vetëdorëzua në ambientet e Drejtorisë e Policisë Tiranë. Dakos do t’i komunikohen akuzat, ndërkohë që ditën e nesërme prokuroria ka detyrimin të paraqitet në ambientet e Drejtorisë së Policisë dhe t’i japë mundësinë zotit Dako të japë shpjegime të detajuara mbi akuzën.
SPAK ka lëshuar sot urdhër-arreste për 7 ish-zyrtarë të bashkisë së Durrësit. Ish-zyrtarët kanë qenë pjesë e Zyrës së Urbanistikës, njëri prej të cilëve është identifikuar si A.Q., ish-drejtori i urbanistikës si dhe Fiqiri Faruku.
Në historinë e tij të karrierës politike, ndaj Dakos janë bërë disa akuza, një prej të cilave ajo e daljes në përgjime në Dosjen “339”, për shitblerje të votave për zgjedhjet e 2017.
Në këtë periudhë, i ftuar në një studio televizive dhe i pyetur për akuzën e lidhjes të tij me grupin e ‘Avdylajve’ të arrestuar për trafik droge, ai thoshte se ‘duart i ka të pastra si akullore”, ndërsa e konsideronte veten në fushatë si supermen.
“Unë në fushatë nuk lëviz as me eskortë politike as me deputetë. Lëviz vetëm me shoferin se nuk më përballon dot njeri. Jam akulllore, i shikon këto duar, janë akullore këto, s’kam prekur as pistoletë, as drogë, as lekë të pista. Unë në fushatë jam superman, bëj takime me 20 vetë, me 50 vetë”, deklaronte ai.
Ka pasur prej disa ditësh fjalë për arrestimin e Dakos në qytetin bregdetar, ndërsa zbuloi se bëhet fjalë për një pallat të ndërtuar me leje, e cila pas marrjes në dorëzim pas tërmetit të vitit 2019 nuk është zbatuar. Po ashtu u zbulua se pallati u mor në dorëzim gjatë kohës që Dako shërbente si kryebashkiak, ndërsa të përfshirë kanë qenë dhe ish-drejtori i Urbanistikës në bashki dhe specialistë të tjerë, disa prej të cilëve kanë vijuar punën në këtë institucion edhe pas kësaj vepre.
Dako ka edhe akuza të tjera në karrierën e tij politike. Kujtojmë se në 30 korrik 2019 Departamenti i Shtetit vendosi -ish-kryetarin e Bashkisë së Durrësit, Vangjush Dako në listën e personave që u ndalohet hyrja në Shtetet e Bashkuara së bashku me familjen.
Në njoftim theksohej se arsyeja e kësaj mase është përfshirja e tij në raste të mëdha korrupsioni.
Sipas ligjeve amerikane, kur Sekretari i Shtetit ka informacione të besueshme se një zyrtar i huaj është përfshirë në raste të mëdha korrupsioni, ose shkelje të të drejtave të njeriut, atij dhe familjes së tij të ngushtë, i ndalohet hyrja në Amerikë.
Po ashtu Dako në vitin 2017 u përfshi në dosjen “e famshme”, “Dosja 339”, me përgjimet për dyshime për shitblerjen e votës në zgjedhjet e qershorit atij viti.
Urdhër arresti nga SPAK për Vangjush Dakon, reagon për herë të parë Rama: Po goditen ata që…
Kryeministri Edi Rama ka reaguar pas urdhër-arrestit nga SPAK për Vangjush Dakon. Gjatë fjalës së tij nga takimi me banorët e Beratit, Rama tha se po goditen njerëz lidhur me pushtetin.
“Për herë të parë në historinë e popullit tonë po goditen njerëz të lidhur me pushtetin. Kjo nuk është e lehtë. Kjo të bën të ndihesh jo mirë se s’ke si ndihesh mirë kur sheh që dikush që ka qenë përkrah teje, është përkrah avokatit përballë prokurorit apo gjykatësit. Me siguri diçka ka ndodhur. Edhe kur e sheh se si mund të përdoret forca e pushtetit të drejtësisë për të bërë edhe gjëra që nuk shkojnë. Të gjitha janë pjesë e një procesi dhe rruga është e përpjetë, jo dishezë. Kini parasysh që për herë të parë ndodh kjo. Për këtë duhet të jemi ne krenarë për PS. Asnjëherë nuk duhen lënë që situata të tilla fyese të lëndojnë krenarinë që je pjesë e kësaj partie që mund të mos zgjedhë shumë probleme, por ka arritur të kthejë Shqipërinë në një vend që shumë njerëz nga e gjithë bota duan të vijnë dhe ta vizitojnë.”, tha Rama.
Deputeti Ervin Salianji, në një lidhje live në edicionin qendror të lajmeve në Neës24 ka folur në lidhje fletë-arrestin e SPAK për ish- kreun e bashkisë Durrës, Vangjush Dako.
Salinaji ka zbuluar se në bazë të informacioneve, ditën e premte ku SPAK është shoqëruar në SPAK është kërkuar arrestimi i tij, por i është vënë në dispozicion një kohë prej disa ditësh, gjë që sipas tij është shqetësuese pasi mund të shfrytëzohet për të fshehur të dhëna e fakte.
Deputeti i PD e konsideroi Dakon si një nga personat më të korruptuar në vend, ndërsa vlerësoi punën e SPAK dhe kërkoi inkurajimin për të vijuar në këtë rrugë.
Urdhër arresti për Vangjush Dakon, Vasili ironizon SPAK: Nuk e bënte dot para zgjedhjeve se…
Nënkryetari i Partisë së Lirisë, Petrit Vasili ka reaguar për lëshimin e urdhër arrestit për Vangjush Dako.
Nëpërmjet një postimi në Facebook, Vasili ka ironizuar vendimin e SPAK, duke shkruar se “nuk e bënte dot para zgjedhjeve, pasi duhej të ruheshin votat”, teksa e ka krahasuar rastin me arrestimin e Belerit.
Sakaq shkruan se arrestimi ishte rilindas.
