Imazhet e para nga ulja në Hënë e anija e vogël japoneze SLIM u publikuan, nga agjencia hapësinore japoneze ( Jaxa).
Me këtë ulje në hënë, Japonia u bë vendi i pestë në botë që u ul në satelitin natyror të Tokës pas SHBA- së, Bashkimit Sovjetik, Kinës dhe Indisë.
Siç u njoftua, SLIM u ul afërsisht 55 metra nga pika e synuar, ndërsa në përgjithësi uljet bëhen në një distancë prej disa kilometrash prej tij. Vihet re se qëllimi fillestar ishte të ulej në Hënë deri në 100 metra nga objektivi i saj.
Megjithatë, mjeti japonez pati një problem serioz: SLIM (Smart Lander për Hetimin e Hënës) zhvilloi një problem me panelet e tij diellore, gjë që e detyroi Jaxa të ndërpresë energjinë e saj më pak se tre orë pas uljes në mënyrë që të kursente bateritë duke e vënë atë përsëri në funksion më vonë.
Jaxa beson se është e mundur që panelet diellore të SLIM të fillojnë të punojnë përsëri kur këndi në të cilin rrezet e diellit godasin vendin e uljes të ndryshojë.
SLIM u ul brenda një krateri të vogël me diametër më pak se 300 metra, të quajtur Sioli dhe ishte në gjendje të zbarkonte me sukses dy roverët e tij të vegjël, të cilët do të analizojnë shkëmbinjtë nga struktura e brendshme e Hënës (manteli hënor), i cili ende është kryesisht i panjohur.
