Ndahet nga jeta në një moshë shumë të re një mjeke shqiptare, e cila jetonte në Gjermani.
Lajmin e hidhur për ndarjen nga jeta të Eni Dokos e ka dhënë kryetarja e Federatës së mjekëve në Europë, Aurora Dollenberg.
“Dr. Eni Doko, një mjeke specialiste dhe njeri i mrekullueshëm është larguar nga jeta, duke i lënë familjes një humbje të pamasë dhe ne si koleg dhe miq të saj, duke na privuar nga privilegji që ta kishim pranë në vitet që vijnë.
Dr. Eni me të qeshurën, bukurinë dhe dritën tënde do mbetesh përhera në zemrat tona”, shkruan kryetarja e shoqatës, Aurora Dollenberg.
Miq dhe të njohur të mjekes së njohur shqiptare, shprehen se e reja ka humbur jetën aksidentalisht, ndërsa makina të cilën e ngiste vetë u përfshi në aksident.
Eni Doko mbaroi studimet në Universitetin e Mjekësisë Tiranë. Në vitin 2016, ajo nisi punë në Qendrën Spitalore Universitare “Nënë Tereza’ dhe më pas u transferua në Gjermani.
“Me hidhërim të thellë ndajmë lajmin e largimit nga jeta të shoqes, mikes, koleges së dashur, mjekes shqiptare në Gjermani Eni Doko! Bashkohemi me dhimbjen e familjes dhe të gjithë atyre që vuajnë këtë humbje tragjike”, shkruajnë miqtë.
Kryesia e Shoqatës se Mjekëve Shqiptarë në Gjermani dhe Kryetarët e Dëgeve janë të gatshëm ti vijnë në ndihmë familjes së Eni Doko”, shkruan shoqata në “Facebook”.
(d.xh/ Balkanweb)
