Kuvendi do të mblidhet sot në një seancë plenare, ku pritet që aksioni opozitar të vijojë dhe seanca të mos zhvillohet normalisht.

Tensionet pritet të rriten edhe për shkak të numrit të lartë të deputetëve të PD të përjashtuar, ku me shtimin e katër emrave për të cilët Sekretariati i etikës mori dje vendimin për përjashtimin, numri shkon në 19.

“Etika” morri dje vendimin që deputetët Bledjon Nallbati, Asllan Dogjani dhe Flamur Noka të përjashtohen nga pjesëmarrja në komisione dhe në seancë plenare për 20 ditë. Ndërkohë për deputetin Gazment Bardhi masa disiplinore ishte 10 ditë.

Ndërkohë ditën e sotme pritet të kalojë në Kuvend disa drafte të rëndësishme, siç është ai për rikthimin e basteve sportive dhe ligji për dekoratat, drafti i të cilit u kthye nga presidenti Begaj për rishikim pasi qeveria synonte që t’i hiqte atij të drejtën e dhënies së dekoratave.

Ishte parashikuar që të votohej edhe marrëveshja me Italinë për emigrantët, por kjo nuk u përfshi në rendin e ditës.

Marrëveshja për emigrantët nuk do të jetë pjesë e votimin në seancën e sotme, për shkak sepse vendimi i GJK duhet zbardhur dhe më tej duhet të botohet në fletoren zyrtare.

Deri tani kjo gjë nuk ka ndodhur e për pasojë marrëveshja nuk do të jetë pjesë e votimit në Kuvend.

Po ashtu do të kalojë ligji për tenderët. Qeveria ka vendosur të ristrukturojë dhënien e tenderëve duke krijuar një agjenci të posaçme që merret me to.