Emisioni “Shqiptarët për shqiptarët” risolli në vëmendjen e publikut këtë të premte rastin e 3-vjeçares Reisila Karaj, e cila vuan nga një sëmundje e rrallë. Mjekët në Shqipëri janë dorëzuar dhe shprehen se një sëmundje e tillë nuk mund të kurohet në vendin tonë.
“Problemet i filluan një vit më parë. Unë nuk kam lënë vend dhe doktor pa kontrolluar dhe më kanë thënë se nuk është parë një sëmundje e tillë. Vajza merr vetëm lëngje dhe nuk ka fuqi fare të lëvizë as të vrapojë. Edhe kur e laj ka frikë”.
Është e dhimbshme të shohësh trupin e një vajze 3-vjeçare që deformohet nga dita në ditë. Për më tepër siç e tha edhe mamaja e vogëlushes kjo sëmundje nuk njihet fare në Shqipëri dhe prindërit nuk dinë se më çfarë ilaçi t’i lehtësojnë dhimbjet vajzës. E trishte për një gjyshe të shohë mbesën që vuan çdo ditë dhe mos të ketë asnjë mundësi për ta ndihmuar.
“Goca qenë shumë mirë dhe një ditë vjen burri në shtëpi dhe thotë se e ka njërën këmbë më të trashë. Nuk po na jep një njeri zgjidhje. U lutem njerëzve që të vënë dorën në zemër se nuk ke çfarë e do jetën kur fëmijë nuk është mirë. Është gjynah”, thotë gjyshja e vajzës. Reiseldës së vogël i duhen 20.000 euro trajtim në mënyrë që tumor mos t’i kthehet malinj.
Elvis Naçi nga studio e emisionit i bëri thirrje çdo shqiptar brenda dhe jashtë kufijve që mund t’i vijë në ndihme familjes për ta orientuar se ku mund te kurohet kjo sëmundje e rrallë. Dhe ndihma nuk mungoi, Reisila ka udhëtuar drejt spitalit Bambino Jesu për tu kuruar pasi paratë për operacionin e saj u grumbulluan nga donatorët.
“Sot ne nisemi për në Itali falënderoj të gjithë ata që mundësuan që të shkoj të shëroj vajzën time në Itali, është një gëzim shumë i madh, vetë, zemra ime e di. Kam shpresë tek spitali dhe besoj se vajza ime do shërohet atje, ju falënderoj Elvis Naçin që mori përsipër shërimin e vajzës, shqiptarët kudo që janë”, thotë e ema e vogëlushes.
“Po mos të ishe emisioni vajza ime do kishte vdekur, falënderoj emisionin Sidritin dhe çdo shqiptar që na ndihmoi”, thotë i ati i Reisildës. Në aeroportin e Rinasit familjarët mes emocioneve të forta përcollën vajzën dhe mamanë e saj për në Itali.
(BalkanWeb)
