Një ngjarje e rëndë është regjistruar mbrëmjen e djeshme në Qafën e Dëvrisë, disa kilometra larg fshatit Gjerbës në Skrapar. Një shtetas turk ka gjetur vdekjen aksidentalisht në një kantier ku nxirren pllaka mermeri.
60-vjeçari Osman Akçay, ishte duke punuar kur cisterna me ujë e njërit prej kamionëve të firmës është shkëputur gjatë ngjitjes së mjetit në zonë malore dhe e ka zënë poshtë.
Shtetasi turk ka gjetur vdekjen në vend dhe trupi i tij i pajetë do të dërgohet në Institutin e Mjekësisë Ligjore në Tiranë, ku edhe do t’i nënshtrohet ekspertizës mjeko-ligjore.
Në vendngjarje kanë shkuar efektivë të Komisariatit të Policisë Skrapar dhe DVP-së Berat, që po punojnë për zbardhjen e shkaqeve të kësaj ngjarjeje të rëndë aksidentale, që i mori jetën shtetasit turk.
Burimet zyrtare të policisë konfirmojnë se ngjarja ka qenë aksidentale dhe se firma e nxjerrjes së mermerit ishte në pronësi të një shtetasi grek.
